नेसन्स कपको उपाधि नेपाललाई बंगलादेशसंग २१ वर्षपछि बदला

काठमाडौं ।विश्वकप छनोट तयारीलाई मध्यनजर गर्दै अखिल नेपाल फुटबल संघ (एन्फा) ले आयोजना गरेको थ्री नेसन्स कप फुटबल प्रतियोगिताको सोमबार भएको फाइनल खेलमा बंगलादेशलाई हराउदै नेपालले उपाधि जितेको छ ।

सोमबार दशरथ रंगशालामा भएको खेलमा बंगलादेशलाई २ ( १ ले पराजित गर्दै नेपालले उपाधि जितेको हो ।उपाधि संगै नेपालले ५ हजार अमेरिकी डलर पुरस्कार पाएको छ । बंगलादेशले ३ हजारमा चित्त वुझाएको छ ।

प्रतियोगितामा नेपाल, बंगलादेश र किर्गिस्तानको २३ वर्षमुनिको टिम सहभागी थिए ।नेपालका लागि १८ औं मिनेटमा सञ्जोग राई र ४२ औं मिनेटमा विशाल राईले गोल गरे । बंगलादेशले ८३ औं मिनेटमा गोल फर्काएको थियो ।

यस्तै ४२ औं मिनेटमा विशाल राईले वान भर्सेस वानमा गोल गर्दै नेपालको अग्रता दोब्बर पारे । रञ्जित धिमालको पासका संजोग राईले वान टचमा उपलब्ध गराएको बलमा विशालले उत्कृष्ट गोल गरे । सन् २०१५ अगष्ट २१ मा भारतविरुद्ध खेल्दै डेब्यु गरेका विशालले नेपालका लागि गरेको यो चौथो गोल हो ।

खेलको सुरुवातदेखि नै हावी भएको नेपालको तर्फबाट सन्जोग राईले १८ औं मिनेटमा गोल गरी नेपाललाई अग्रता दिलाएका थिए । उनको यो राष्ट्रिय टिममा पहिलो गोल हो ।बंगलादेशको तर्फबाट कप्तान जमन भुएनको कर्नरमा वैकल्पिक खेलाडीको रुपमा मैदान प्रवेश गरेका रहमानले उत्कृष्ट हेडर गोल गरेका थिए ।

नेपाल र बंगलादेश फुटबलको फाइनलमा भिडेको यो तेस्रो पटक हो । यसअघि सन् १९९४ को पहिलो साग र १९९९ को आठौं सागमा यी दुई टोली फाइनलमा खेलेका थिए ।जित संगै २१ वर्षपछि नेपालले हारको बदला पनि दशरथ रंगशालामै लिएको छ।